O aumento da importancia de protexerse ante ameazas cibernéticas reflíctese nos últimos datos publicados ao respecto: o 44 % das empresas en España prevén incrementar o seu investimento en infraestruturas e programas de ciberseguridade (máis dun 20 %) e as procuras realizadas pola cidadanía ao respecto aumentaron tamén un 40 %.

O Incibe sinala que Galicia rexistra un 4,3 % dos incidentes de ciberseguridade identificados no ámbito nacional, o que a sitúa no sexto posto da clasificación estatal. O incremento sostido do cibercrime fai máis preciso que nunca poder contar con contornas dixitais seguras, tanto para a actividade empresarial como para a vida diaria das persoas, na que a tecnoloxía xa se converteu nuha parte fundamental.

Neste contexto, no que ademais a ciberseguridade está entre as tecnoloxías clave para afrontar os retos dixitais da nova década, o Goberno galego puxo en marcha no 2020 CIBER.gal, o Nodo de Ciberseguridade de Galicia, un instrumento de cooperación entre Fegamp, Xunta, as catro deputacións, Incibe e CNN para impulsar a concienciación e a formación de cidadanía e empresas, dar resposta a retos complexos e promover a xeración de talento neste ámbito.

Segundo o  Informe de situación da ciberseguridade en Galicia, o 80 % dos axentes entrevistados considera que o Nodo contribuirá ao crecemento do sector da ciberseguridade na comunidade, incrementará a  concienciación en empresas e poboación,  facilitará  a xeración dunha rede de colaboración e  aumentará o investimento na I+D+i en ciberseguridade. 

A implicación das tres Administracións con competencia na materia en CIBER.gal busca un intercambio fluído de información e recursos, e promove tamén a colaboración público-privada para crear unha carteira de servizos que dote a Galicia de autonomía nun sector estratéxico. Así conseguirase que a ciberseguridade se converta nun motor de I+D+i, co que se lograráun bo posicionamento do sector. Entre os obxectivos marcados pola Xunta co nodo CIBER. gal está situalo a nivel nacional e europeo a medio prazo e xerar este talento especializado que permita desenvolver unha industria propia.

A actividade do nodo CIBER.gal é a de focalizarse na formación e a concienciación á cidadanía, ás empresas, en especial ás pemes, e ás Administracións Públicas. 

Para a cidadanía, os servizos centraranse en accións de formación a estudantes e eventos participativos para os diferentes niveis educativos (secundaria, bacharelato, formación profesional e universidade). Ademais, desenvolveranse accións de capacitación básica no uso seguro das tecnoloxías para persoas maiores.

Para as pemes e autónomos, a concienciación e a difusión tamén serán eixes prioritarios dos servizos de CIBER.gal en colaboración con outros axentes do Nodo.

Para os concellos e as deputacións, está previsto o deseño de actividades de capacitación e concienciación para axentes clave destas entidades e formación técnica avanzada para os seus profesionais dos servizos tecnolóxicos.